मतदान साहित्य घेऊन कर्मचारी मतदान केंद्रांकडे रवाना

पुणे : महाराष्ट्र विधान परिषदेच्या पुणे विभाग पदवीधर व शिक्षक मतदारसंघांच्या द्विवार्षिक निवडणुकीसाठी प्रशासकीय यंत्रणा सज्ज झाली आहे. मतदानासाठी नियुक्त अधिकारी व कर्मचाऱ्यांची पथके आवश्यक मतदान साहित्य ताब्यात घेऊन गुरुवारी( ता .22 )संबंधित मतदान केंद्रांकडे रवाना झाली आहेत. पुणे जिल्ह्यातील २३२ मतदान केंद्रांवर शुक्रवार, ता. २३ ऑक्टोबर रोजी सकाळी ८ ते सायंकाळी ४ या वेळेत मतदान होणार आहे. मतदान प्रक्रिया सुरळीत, शांततेत आणि पारदर्शक वातावरणात पार पाडण्यासाठी जिल्हा प्रशासनाने केंद्रनिहाय नियोजन केले आहे.
मतदान साहित्याचे वितरण; पथके केंद्रांवर दाखल होण्यासाठी रवाना:
मतदानासाठी नियुक्त पथकांनी साहित्य वितरण केंद्रांवरून आवश्यक साहित्य ताब्यात घेतले . मतदानाच्या दिवशी कोणतीही अडचण येऊ नये, यासाठी मतदान साहित्याची उपलब्धता, कर्मचारी नियुक्ती, वाहतूक आणि केंद्रांवरील पूर्वतयारी यांचे नियोजन करण्यात आले आहे. मतदानानंतर साहित्य सुरक्षितपणे स्वीकारणे आणि निर्धारित ठिकाणी जमा करणे यासाठीही व्यवस्था करण्यात आली आहे.
पुणे जिल्ह्यात पदवीधर मतदारसंघासाठी १६०, तर शिक्षक मतदारसंघासाठी ७२ मतदान केंद्रे निश्चित करण्यात आली आहेत. पदवीधर मतदारसंघात ४७, तर शिक्षक मतदारसंघात ३० उमेदवार निवडणूक रिंगणात आहेत. दोन्ही मतदारसंघांतील मतदान प्रक्रिया व्यवस्थित पार पाडण्यासाठी आवश्यक मनुष्यबळ आणि मतदान साहित्याचे वितरण करण्यात आले आहे.
पुणे शहरासह तालुक्यांसाठी स्वतंत्र व्यवस्था:
मतदान साहित्य वितरण, मतदानानंतर साहित्य स्वीकारणे आणि स्ट्राँगरूमसाठी पुणे शहरासह पुरंदर, हवेली, मावळ-मुळशी, भोर-वेल्हा, दौंड, जुन्नर, खेड आणि बारामती-इंदापूर या तालुका क्षेत्रांसाठी स्वतंत्र व्यवस्था करण्यात आली आहे.
पुरंदरसाठी नवीन प्रशासकीय इमारत, पारगाव रोड; हवेलीसाठी सिंहगड कॉलेज, आंबेगाव; पुणे शहरासाठी श्री गणेश कला क्रीडा रंगमंच, स्वारगेट; मावळ-मुळशीसाठी संबंधित तहसील कार्यालये; भोर-वेल्ह्यासाठी तहसील कार्यालय, भोर येथील पुरवठा शाखा; दौंड, जुन्नर आणि खेडसाठी संबंधित तहसील कार्यालये; तर बारामती-इंदापूरसाठी अभियांत्रिकी भवन, बारामती येथे व्यवस्था करण्यात आली आहे.
येत्या २७ ऑक्टोबर रोजी मतमोजणी होणार आहे.